پاکستان اسٹاک ایکسچینج میں زبردست تیزی، 100 انڈیکس نے 1 لاکھ 85 ہزار کی سطح بحال کر لی

کراچی: پاکستان اسٹاک ایکسچینج میں کاروباری ہفتے کے دوران کاروبار کا اختتام مثبت رجحان کے ساتھ ہوا، جہاں کے ایس ای 100 انڈیکس میں نمایاں اضافہ ریکارڈ کیا گیا۔

کاروباری دن کے اختتام پر 100 انڈیکس 883 پوائنٹس کے اضافے سے 185,057 پوائنٹس پر بند ہوا، جس کے ساتھ ہی 1 لاکھ 85 ہزار پوائنٹس کی نفسیاتی حد دوبارہ بحال ہو گئی۔ٹریڈنگ کے دوران مارکیٹ میں بھرپور سرگرمی دیکھی گئی اور انڈیکس کی بلند ترین سطح 185,611 پوائنٹس جبکہ کم ترین سطح 182,792 پوائنٹس ریکارڈ کی گئی۔دن بھر 42 ارب 20 کروڑ روپے مالیت کے 74 کروڑ شیئرز کے سودے ہوئے، جو سرمایہ کاروں کے بڑھتے ہوئے اعتماد کی عکاسی کرتے ہیں۔اعداد و شمار کے مطابق 564 لسٹڈ کمپنیوں میں سے 214 کمپنیوں کے شیئرز میں تیزی جبکہ 222 کمپنیوں کے شیئرز میں منفی رجحان دیکھا گیا۔کاروبار کے اختتام پر مارکیٹ کیپیٹلائزیشن 142 ارب روپے کے اضافے سے بڑھ کر 20 ہزار 969 ارب روپے تک پہنچ گئی۔ماہرین کے مطابق مثبت معاشی اشاریے اور سرمایہ کاروں کی دلچسپی کے باعث آنے والے دنوں میں مارکیٹ میں مزید استحکام کا امکان ہے۔