پاکستان نے شاندار کارکردگی کے ساتھ ٹینٹ پیگنگ ورلڈ کپ کیلئے کوالیفائی کرلیا

عمان میں منعقدہ ٹینٹ پیگنگ ورلڈ کپ کے کوالیفائنگ راؤنڈ میں پاکستان کی ٹیم نے شاندار کارکردگی کا مظاہرہ کرتے ہوئے مجموعی طور پر پہلی پوزیشن حاصل کر کے ورلڈ کپ کے لیے کوالیفائی کر لیا ہے۔ اس عالمی کوالیفائنگ راؤنڈ میں پاکستان کے علاوہ عمان، امریکا، ایران، ازبکستان اور قطر کی ٹیموں نے حصہ لیا تھا، جہاں پاکستانی گھڑ سواروں نے بہترین صلاحیتوں کا لوہا منواتے ہوئے میدان مار لیا۔

پاکستان کے نامور رائڈر تصور عباس لک نے رنگ اینڈ پیگ، لیمن سلیشنگ اور ریلے سنگل لائن مقابلوں میں 3 گولڈ میڈلز حاصل کر کے نمایاں ترین کارکردگی کا مظاہرہ کیا، جس پر انہیں ٹورنامنٹ کا بہترین کھلاڑی قرار دیا گیا اور ’’دی گولڈن لیجنڈ‘‘ کے خطاب سے نوازا گیا۔ دیگر کھلاڑیوں میں محمد صغیر زرگر نے تلوار کے انفرادی مقابلے میں گولڈ میڈل اور مجموعی انفرادی مقابلوں میں سلور میڈل جیتا۔ صاحبزادہ سلطان محمد علی نے قومی گھڑ سواروں کی اس تاریخی کامیابی کو سراہتے ہوئے کہا کہ کھلاڑیوں نے عالمی سطح پر ملک کا نام روشن کیا ہے۔