پیٹرولیم سیکٹر میں شفافیت کے لیے جامع اصلاحات، اسمگلنگ روکنے کو ٹریک اینڈ ٹریس نظام متعارف

اسلام آباد: حکومت نے پیٹرولیم سیکٹر میں بہتری اور شفافیت کو یقینی بنانے کے لیے جامع اصلاحات پر عملدرآمد شروع کر دیا ہے۔ پیٹرولیم ڈویژن کے مطابق پیٹرول پمپس اور فیول سپلائی چین میں اسمگلنگ کے خاتمے کے لیے ٹریک اینڈ ٹریس نظام متعارف کرایا گیا ہے۔

پیٹرولیم ڈویژن کا کہنا ہے کہ قانونی پیٹرول پمپس سے متعلق معلومات فراہم کرنے کے لیے ’’راہگزر‘‘ موبائل ایپ لانچ کر دی گئی ہے، جس کے ذریعے صارفین مستند اور منظور شدہ فیول پمپس کی شناخت کر سکیں گے۔

اعلامیے کے مطابق اوگرا اور پنجاب انفارمیشن ٹیکنالوجی بورڈ (پی آئی ٹی بی) نے آئل ٹینکرز کی نگرانی کے لیے مشترکہ ٹریک اینڈ ٹریس سسٹم تیار کر لیا ہے، جس کے تحت فیول ٹینکرز، ٹرمینلز اور ریٹیل آؤٹ لیٹس کو ایک مربوط نظام سے منسلک کیا جا رہا ہے۔ پیٹرول پمپس پر خودکار ٹینک گیجز اور ڈیجیٹل نوزلز کی تنصیب بھی کی جائے گی۔