سلو اوور ریٹ پر پاکستان کرکٹ ٹیم کو بڑا نقصان، 11 چیمپئن شپ پوائنٹس کٹ گئے

انگلینڈ کے خلاف کھیلے گئے تیسرے ٹیسٹ میچ میں سلو اوور ریٹ کی مرتکب ہونے پر پاکستان کرکٹ ٹیم کو بھاری سزا کا سامنا کرنا پڑا ہے۔ انٹرنیشنل کرکٹ کونسل (آئی سی سی) کے مطابق قومی ٹیم مقررہ وقت میں 11 اوورز کم کرانے کی قصوروار پائی گئی، جس پر آئی سی سی کے میچ ریفری رنجن مدوگالے نے پاکستان پر میچ فیس کا 50 فیصد جرمانہ عائد کرنے کے ساتھ آئی سی سی ورلڈ ٹیسٹ چیمپئن شپ کے پوائنٹس ٹیبل سے 11 اہم پوائنٹس کاٹنے کا حکم جاری کر دیا ہے۔

آئی سی سی قوانین کے تحت ہر ایک کم اوور پر میچ فیس کا 5 فیصد جرمانہ عائد کیا جاتا ہے، تاہم اس کی زیادہ سے زیادہ حد 50 فیصد تک ہوتی ہے، جس کی بنا پر پاکستان ٹیم کو یہ زیادہ سے زیادہ مالی جرمانہ کیا گیا۔ اس کے علاوہ، ٹیسٹ چیمپئن شپ کے ضوابط کے مطابق مقررہ وقت میں کم کرائے گئے ہر ایک اوور کے عوض ایک پینلٹی پوائنٹ کاٹا جاتا ہے، جس سے پاکستان کے 11 پوائنٹس منہا ہو گئے ہیں اور اس سے ورلڈ ٹیسٹ چیمپئن شپ کے فائنل میں پہنچنے کے امکانات پر گہرا اثر پڑے گا۔ قومی ٹیم کے کپتان بابر اعظم نے اپنی غلطی تسلیم کر لی ہے جس کے باعث باقاعدہ سماعت کی ضرورت پیش نہیں آئی۔