ایشین گیمز: غیر معروف کھیل سافٹ ٹینس کے 14رکنی دستے کا اعلان

پاکستان اولمپک ایسوسی ایشن (POA) نے جاپان میں ہونے والے 20ویں ایشین گیمز کے لیے ایک غیر مقبول اور ملک میں نہ کھیلے جانے والے کھیل ‘سافٹ ٹینس’ کا 14 رکنی بڑا دستہ روانہ کرنے کا حیران کن اعلان کر دیا ہے۔ جاپان کے شہر ایچی ناگویا میں 19 ستمبر سے 4 اکتوبر تک منعقد ہونے والے ان گیمز کے لیے یہ ٹیم 14 ستمبر کو پاکستان سے روانہ ہو رہی ہے۔ حیرت انگیز بات یہ ہے کہ پاکستان میں سافٹ ٹینس کی نہ تو کوئی فعال فیڈریشن یا ایسوسی ایشن ہے اور نہ ہی اس کے کوئی باقاعدہ مقابلے منعقد کیے جاتے ہیں، جس سے خدشہ ظاہر کیا جا رہا ہے کہ غیر معروف افراد کی یہ کھیپ بیرونِ ملک جا کر غائب (سلپ) ہو سکتی ہے۔

اس فیصلے پر پاکستان ٹینس فیڈریشن (PTF) کے سربراہ اور نامور ٹینس اسٹار اعصام الحق نے شدید حیرانی اور برہمی کا اظہار کیا ہے۔ اعصام الحق کا کہنا ہے کہ وہ خود اس بات سے بے خبر ہیں کہ پاکستان میں سافٹ ٹینس کا وجود کس حیثیت میں ہے اور یہ ٹیم کس کی منظوری سے بھیجی جا رہی ہے۔ انہوں نے پاکستان اسپورٹس بورڈ (PSB) کی پالیسیوں پر سخت تنقید کرتے ہوئے الزام عائد کیا کہ اسپورٹس بورڈ کھیلوں کو تباہ کر رہا ہے اور جو پیسے فراہم کر سکتا ہے اسے ایونٹ میں جانے دیا جاتا ہے۔ انہوں نے واضح کیا کہ روایتی ٹینس کے لیے صرف چار افراد (دو کھلاڑی، ایک کپتان اور ایک کوچ) بھیجے جا رہے ہیں، جبکہ ایک غیر معروف کھیل کے لیے 14 افراد کی منظوری دی گئی ہے۔