آئی سی سی ٹی 20 ورلڈکپ 2026: بھارت سے شکست کے بعد پاکستان کے لیے آخری گروپ میچ لازمی

آئی سی سی ٹی ٹوئنٹی ورلڈکپ دو ہزار چھبیس میں بھارت کے ہاتھوں شکست کے بعد سپر ایٹ مرحلے میں کوالیفائی کرنے کے لیے پاکستان کو اپنا آخری گروپ میچ لازمی جیتنا ہوگا۔
پاکستان کواکسٹھ رنز سے شکست دینے کے بعد گروپ اے سے بھارت سپرایٹ مرحلے میں پہنچ چکا ہے۔ بھارت کے خلاف اکسٹھ رنز کی شکست سے پاکستان کے نیٹ رن ریٹ کو بھاری دھچکا پہنچا ہے۔ شکست کے بعد پاکستان کا نیٹ رن ریٹ زیرو پوائنٹ نائن تھری ٹو سے گر کرمنفی زیرو پوائنٹ چار زیرو تین ہوگیا ہے اور نیٹ رن ریٹ کی بنیاد پر پاکستان پوائنٹس ٹیبل پر امریکا سے نیچے آگیا ہے۔امریکا کے چار میچز میں دو فتوحات کے ساتھ چار پوائنٹس اور رن ریٹ زیرو پوائنٹ سات آٹھ آٹھ ہے۔ پاکستان کا آخری گروپ میچ نمیبیا سے ہے جو کہ اٹھارہ فروری کو کھیلا جائےگا۔ سپر ایٹ مرحلے میں جانے کے لیے پاکستان کو یہ میچ لازمی جیتنا ہوگا، نمیبیا نے اگر اپ سیٹ کردیا تو پاکستان سپرآٹھ کی دوڑ سے باہر ہوجائےگا۔