ای سپورٹس ورلڈ کپ: محمد زبیر نے ٹیکن 8 کا عالمی ٹائٹل جیت لیا

پاکستان کے ابھرتے ہوئے ای اسپورٹس پلیئر محمد زبیر نے ایک اور عالمی اعزاز ملک کے نام کرتے ہوئے ای اسپورٹس ورلڈ کپ میں “ٹیکن 8” (Tekken 8) کا ٹائٹل اپنے نام کر لیا ہے۔ پیرس کے ایکسپو پورٹ دے ورسائی میں 5 سے 8 اگست تک منعقد ہونے والے اس ورلڈ کپ فائنل میں محمد زبیر نے جنوبی کوریا کے معروف کھلاڑی ‘لو ہائی’ (LowHigh) کو یکطرفہ مقابلے کے بعد 5-0 سے شکست دی۔ اس تاریخی کامیابی کے ساتھ ہی محمد زبیر نے 2 لاکھ 50 ہزار امریکی ڈالر کی انعامی رقم اور کلب چیمپئن شپ کے 1,000 پوائنٹس بھی حاصل کر لیے۔

دنیا بھر سے 32 ٹاپ کھلاڑیوں کی موجودگی میں زبیر کا سفر انتہائی شاندار رہا۔ انہوں نے سیمی فائنل کے سنسنی خیز معرکے میں اپنے ہم وطن اور 8 مرتبہ کے ایوو چیمپئن ارسلان ایش کو 5-4 سے ہرایا تھا۔ دوسری جانب ارسلان ایش آسٹریلیا کے یگامی سے شکست کے بعد چوتھی پوزیشن حاصل کر سکے۔ ای اسپورٹس ورلڈ کپ انتظامیہ کی جانب سے سوشل میڈیا پر محمد زبیر کو ان کی شاندار فتح پر بھرپور خراجِ تحسین پیش کیا گیا ہے، جبکہ فائٹنگ گیمنگ کی دنیا میں پاکستانی کھلاڑیوں کا دبدبہ ایک بار پھر ثابت ہو گیا ہے۔