محکمہ موسمیات پاکستان نے اہم تاریخی اعزاز اپنے نام کر لیا

محکمہ موسمیات پاکستان (پی ایم ڈی) نے عالمی سطح پر ایک اور اہم اور تاریخی اعزاز اپنے نام کر لیا ہے۔ عالمی موسمیاتی تنظیم (WMO) نے باقاعدہ طور پر پاکستان کی 8 ہائیڈرولوجیکل مشاہدہ گاہوں (Hydrological Observatories) کو عالمی سطح پر تسلیم کرنے کا اعلان کیا ہے۔

محکمہ موسمیات کے ترجمان کے مطابق، پاکستانی ہائیڈرولوجیکل مشاہدہ گاہوں کو یہ منفرد اعزاز 100 سال سے زائد عرصے تک موسمیاتی اور آبی شعبے میں مسلسل اور بہترین خدمات فراہم کرنے کے اعتراف میں دیا گیا ہے۔

اس تاریخی کامیابی پر عالمی موسمیاتی تنظیم کی جانب سے محکمہ موسمیات پاکستان کو خصوصی تعریفی اسناد اور یادگاری ‘براس پلیٹس’ سے بھی نوازا گیا ہے۔ عالمی سطح پر ملنے والی اس پذیرائی کو دنیا بھر کے موسمیاتی اور آبی مشاہداتی نظام میں پاکستان کے دیرینہ اور مؤثر کردار کا ایک بڑا عالمی اعتراف قرار دیا جا رہا ہے۔