پاکستان جونیئر سکواش ٹیم ورلڈ چیمپئن شپ میں شرکت کے لیے کینیڈا روانہ

ورلڈ جونیئر اسکواش چیمپئن شپ 2026 میں شرکت کے لیے پاکستان کی 4 رکنی جونیئر اسکواش ٹیم اسلام آباد انٹرنیشنل ایئرپورٹ سے کینیڈا روانہ ہو گئی ہے۔ یہ عالمی چیمپئن شپ 20 سے 31 جولائی تک کینیڈا میں کھیلی جائے گی، جس میں دنیا بھر کے 24 ممالک سے 19 سال سے کم عمر کے 185 بہترین کھلاڑی ٹائٹل کے لیے مدمقابل ہوں گے۔ کینیڈا روانہ ہونے والے قومی اسکواڈ میں عبداللہ نواز، نعمان خان، محمد عمیر عارف اور یحییٰ خان شامل ہیں، جبکہ ٹیم کے ہمراہ منیجر منصور زمان اور ہیڈ کوچ فہیم گل بھی موجود ہیں۔ روانگی کے موقع پر قومی جونیئر کھلاڑیوں نے عزم کا اظہار کیا کہ وہ ایونٹ میں عمدہ کھیل کا مظاہرہ کرتے ہوئے عالمی سطح پر پاکستان کا نام روشن کرنے کی بھرپور کوشش کریں گے۔