پی ایچ ایف نے جنوبی کوریا ہاکی فیڈریشن کی جانب سے دعوت قبول کر لی

پاکستان ہاکی فیڈریشن (پی ایچ ایف) نے جنوبی کوریا ہاکی فیڈریشن کی جانب سے بھیجی گئی باضابطہ دعوت قبول کر لی ہے، جس کے تحت قومی ہاکی ٹیم ایشین گیمز کی تیاریوں کے سلسلئے میں جنوبی کوریا کا دورہ کرے گی۔ جاپان میں منعقد ہونے والے ایشین گیمز کی روانگی سے قبل قومی اسکواڈ 8 ستمبر سے 15 ستمبر 2026 تک جنوبی کوریا میں بین الاقوامی میچوں کی سیریز اور خصوصی تربیتی سیشنز میں حصہ لے گا۔ یہ دورہ ایف آئی ایچ ہاکی ورلڈ کپ اور ایشین گیمز کے درمیانی وقفے میں ترتیب دیا گیا ہے، جس کا بنیادی مقصد قومی کھلاڑیوں کو ایشین گیمز جیسے بڑے ایونٹ سے قبل ایک مضبوط اور حریفانہ ماحول میں بین الاقوامی میچ پریکٹس فراہم کرنا ہے۔

دورے کے حتمی شیڈول اور دیگر لاجسٹک انتظامات کے حوالے سے دونوں فیڈریشنز کے درمیان مشاورت جاری ہے، جس کا باضابطہ اعلان جلد کر دیا جائے گا۔ پی ایچ ایف کے صدر محی الدین احمد وانی نے اس دعوت کا خیرمقدم کرتے ہوئے جنوبی کوریا ہاکی فیڈریشن کا شکریہ ادا کیا اور کہا کہ یہ سیریز کھلاڑیوں کی فارم کو برقرار رکھنے اور عالمی سطح کا تجربہ حاصل کرنے کے لیے انتہائی اہم ثابت ہوگی۔ انہوں نے امید ظاہر کی کہ یہ سیریز ایشین گیمز کی تیاریوں میں سنگِ میل ثابت ہونے کے ساتھ دونوں ممالک کے درمیان کھیل کے روابط کو مزید مضبوط کرے گی۔ پی ایچ ایف نے اعادہ کیا کہ بین الاقوامی سطح پر ملک کا نام روشن کرنے کے لیے قومی ٹیم کو تمام اعلیٰ ترین سہولیات فراہم کی جاتی رہیں گی۔