پاکستان ہاکی ٹیم کے کپتان ابو بکر ورلڈکپ میں بہترین پرفارمنس دینے کیلئے پُرامید

پاکستان کی قومی ہاکی ٹیم کے نئے مقرر کردہ کپتان ابو بکر نے ایف آئی ایچ ہاکی ورلڈ کپ میں بہترین پرفارمنس دینے اور قوم کی توقعات پر پورا اترنے کا عزم ظاہر کیا ہے۔

نیدرلینڈز اور بیلجیئم روانگی سے قبل ایئرپورٹ پر میڈیا سے گفتگو کرتے ہوئے قومی کپتان نے کہا کہ ان پر کپتانی کا کوئی اضافی دباؤ نہیں ہے اور ٹیم کے تمام سینئر و جونیئر کھلاڑی ایک پیج پر متحد ہیں۔ روایتی حریف کے ساتھ مقابلے کے بارے میں گفتگو کرتے ہوئے ابو بکر کا کہنا تھا کہ پرو لیگ کی نسبت ورلڈ کپ میں بھارتی ٹیم کے خلاف میچ بالکل مختلف ہوگا؛ ان کی اور پوری ٹیم کی کوشش ہوگی کہ روایتی حریف کو شکست دے کر ایونٹ میں شاندار پیش قدمی کی جائے۔ انہوں نے مزید کہا کہ سینئر کھلاڑی میدان میں ایک دوسرے کی مکمل رہنمائی اور سپورٹ کر رہے ہیں۔

دوسری جانب قومی اسکواڈ کے اہم کھلاڑیوں عماد بٹ، حنان شاہد اور سفیان خان نے میڈیا سے بات کرتے ہوئے کہا کہ ورلڈ کپ میں ان کا پہلا ہدف ٹاپ فور (سیمی فائنل) میں جگہ بنانا ہے، جس کے بعد ان کی منزل وکٹری اسٹینڈ پر کھڑے ہو کر ملک کا نام روشن کرنا ہے۔