یکم فروری سے پیٹرولیم مصنوعات کی قیمتوں میں اضافہ، پٹرول میں معمولی کمی متوقع

مارکیٹ اور انڈسٹری ذرائع کے مطابق یکم فروری سے ملک میں پیٹرولیم مصنوعات کی قیمتوں میں ردوبدل متوقع ہے۔ ہائی اسپیڈ ڈیزل 9 روپے 47 پیسے فی لیٹر مہنگا ہونے کا امکان ہے جبکہ لائٹ ڈیزل آئل کی قیمت میں 6 روپے 95 پیسے فی لیٹر اضافہ متوقع ہے۔

مٹی کے تیل کی قیمت میں 3 روپے 69 پیسے فی لیٹر اضافہ ہو سکتا ہے۔ اس کے برعکس، پٹرول کی قیمت میں معمولی کمی متوقع ہے اور اس کا تخمینہ 36 پیسے فی لیٹر ہے۔

ذرائع کے مطابق وزارت پیٹرولیم وزیر اعظم کی منظوری کے بعد 31 جنوری کو نئی قیمتوں کا نوٹیفیکیشن جاری کرے گی۔ ملک بھر میں پیٹرولیم مصنوعات کی قیمتوں میں یہ تبدیلی یکم فروری سے نافذ العمل ہو گی۔