قومی ہاکی ٹیم کے سابق کپتان خالد محمود انتقال کر گئے

پاکستان ہاکی ٹیم کے سابق کپتان اور اولمپک گولڈ میڈلسٹ خالد محمود طویل علالت کے بعد 84 برس کی عمر میں انتقال کر گئے ہیں۔ مرحوم کے بیٹے کے مطابق ان کی نمازِ جنازہ فیصل آباد میں ادا کی جائے گی۔ 28 دسمبر 1941ء کو جہلم میں پیدا ہونے والے خالد محمود قومی ہاکی ٹیم کے سنہری دور کی ان کامیاب ترین ٹیموں کا اہم حصہ رہے جنہوں نے عالمی اور ایشیائی سطح پر ملک کا نام روشن کیا۔ وہ اپنے دور میں رائٹ آؤٹ پوزیشن پر کھیلتے تھے۔

خالد محمود نے 1964ء کے ٹوکیو اولمپکس اور 1966ء کے بینکاک ایشین گیمز میں پاکستان کے لیے سلور میڈل حاصل کرنے والی ٹیموں کی نمائندگی کی۔ اس کے بعد وہ 1968ء کے میکسیکو اولمپکس میں تاریخ رقم کرنے والی پاکستان کی گولڈ میڈلسٹ ہاکی ٹیم کے رکن رہے۔ انہوں نے 1970ء کے ایشین گیمز میں بھی پاکستان کی فاتح گولڈ میڈلسٹ ٹیم کا حصہ بننے کا اعزاز حاصل کیا۔ میدانِ کھیل سے ریٹائرمنٹ کے بعد خالد محمود نے پاکستان ہاکی فیڈریشن (PHF) کے سیکریٹری اور قومی ہاکی ٹیم کے منیجر کے طور پر بھی گراں قدر خدمات انجام دیں۔ ان کے انتقال پر انٹرنیشنل ہاکی فیڈریشن، ایشین ہاکی فیڈریشن، وزیراعظم محمد شہباز شریف اور ملک کی کھیل برادری نے گہرے دکھ اور افسوس کا اظہار کیا ہے