پاکستان کی برآمدات جنوری میں پہلی بار 3 ارب ڈالر سے تجاوز کرگئی

ایس آئی ایف سی کی معاشی اور تجارتی حکمت عملی کے نتیجے میں پاکستان نے برآمدات اور تجارتی ترقی میں تاریخی سنگِ میل عبور کر لیا۔ جنوری 2026 میں پاکستان کی برآمدات پہلی بار 3 ارب ڈالر سے تجاوز کر گئیں۔

پاکستان بیورو آف سٹاٹسٹکس کے مطابق برآمدات میں تقریباً 35 فیصد اضافہ اور درآمدات میں تقریباً 5 فیصد کمی کے باعث تجارتی خسارہ نمایاں طور پر کم ہوا۔ جنوری میں درآمدات تقریباً 5.5 ارب ڈالر رہیں، جبکہ مالی سال کے پہلے سات ماہ میں مجموعی برآمدات 18 ارب ڈالر اور درآمدات 40 ارب ڈالر ریکارڈ کی گئیں۔

برآمدات میں یہ اضافہ ملکی زرمبادلہ کے ذخائر، روزگار کے مواقع اور اقتصادی خودمختاری کے فروغ کے لیے اہم پیش رفت سمجھا جا رہا ہے، جبکہ تجارتی سرگرمیوں میں مضبوط پیش رفت ملکی معیشت کے لیے خوش آئند ہے۔