یورپ جانے کی غیرقانونی کوششوں میں 47 فیصد کمی ، محسن نقوی کی یورپی کمشنر سے اہم ملاقات

برسلز میں وفاقی وزیر داخلہ محسن نقوی اور یورپی یونین کی کمشنر برائے داخلی امور و مائیگریشن میگنس برنر کے درمیان اہم ملاقات ہوئی، جس میں غیرقانونی امیگریشن کی روک تھام، انسانی اسمگلنگ کے خلاف اقدامات اور باہمی تعاون کے فروغ پر تفصیلی بات چیت کی گئی۔

بیان کے مطابق یورپی کمشنر میگنس برنر نے پاکستان سے یورپ کے لیے ڈنکی کے ذریعے غیرقانونی سفر کی کوششوں میں رواں برس 47 فیصد کمی کو سراہتے ہوئے اسے پاکستان کی ایک “مثالی کامیابی” قرار دیا۔

محسن نقوی نے بتایا کہ رواں سال پاکستان میں 1,770 انسانی اسمگلرز اور ان کے ایجنٹس گرفتار کیے گئے، جبکہ ملاقات میں اس بات پر بھی اتفاق کیا گیا کہ غیرقانونی امیگریشن، انسانی اسمگلنگ اور منشیات کی اسمگلنگ کے خلاف مشترکہ حکمت عملی کو مزید مضبوط بنایا جائے گا۔

وزیر داخلہ کا کہنا تھا کہ اسمگلرز، ڈرگ مافیا اور دہشتگردوں کا گٹھ جوڑ ہر ملک کے لیے ایک بڑا چیلنج ہے، اور اس کا مقابلہ کرنے کے لیے بین الاقوامی سطح پر قریبی تعاون ناگزیر ہے۔