پاکستان کا آبنائے ہرمز میں معمول کی بحری نقل و حرکت کی بحالی کا مطالبہ

اقوام متحدہ میں پاکستان کے مستقل مندوب عاصم افتخار نے جنرل اسمبلی سے خطاب کرتے ہوئے عالمی برادری پر زور دیا ہے کہ آبنائے ہرمز میں بحری نقل و حرکت کو فی الفور معمول پر لایا جائے۔ انہوں نے واضح کیا کہ مشرق وسطیٰ کی موجودہ صورتحال پر پاکستان کا مؤقف دو ٹوک ہے، کیونکہ اس تنازع کے اثرات اب محض خطے تک محدود نہیں رہے بلکہ عالمی سطح پر محسوس کیے جا رہے ہیں۔

پاکستانی مندوب نے عالمی فورم کو آگاہ کیا کہ پاکستان نے بحران کے آغاز سے ہی کشیدگی میں کمی اور جنگ بندی کو اپنی اولین ترجیح قرار دیا ہے۔ اس سلسلے میں پاکستان کی سفارتی کوششوں کا ذکر کرتے ہوئے انہوں نے بتایا کہ 11 اور 12 اپریل کو اسلام آباد میں ہونے والے کامیاب مذاکرات اسی سلسلے کی ایک کڑی تھے، جس کا مقصد جنگ کے خاتمے اور امن کی بحالی کے لیے راہ ہموار کرنا تھا۔

عاصم افتخار نے خبردار کیا کہ آبنائے ہرمز میں پیدا ہونے والی رکاوٹیں اور عسکری کشیدگی انسانی بحران کو جنم دے رہی ہے۔ انہوں نے کہا کہ اگر یہ صورتحال برقرار رہی تو یہ عالمی معاشی مشکلات میں تبدیل ہو جائے گی، جس سے دنیا بھر کے ممالک متاثر ہوں گے۔ انہوں نے خلیج تعاون کونسل (GCC) کے ممالک کے ساتھ پاکستان کی مکمل یکجہتی کا اعادہ کرتے ہوئے مطالبہ کیا کہ تجارتی راستوں کو بلا تعطل بحالی کے لیے فوری اقدامات کیے جائیں۔