وزیراعظم سے ترک وزیر خارجہ کی ملاقات، طیب اردوان کا اہم پیغام پہنچا دیا

وزیراعظم پاکستان شہباز شریف اپنے سرکاری دورہ ترکیہ کے سلسلے میں آج انطالیہ پہنچ گئے، جہاں جمہوریہ ترکیہ کے وزیرِ خارجہ حاقان فیدان نے ان سے تفصیلی ملاقات کی۔ اس اہم سفارتی ملاقات کے دوران نائب وزیراعظم و وزیر خارجہ اسحاق ڈار اور معاون خصوصی طارق فاطمی بھی وزیراعظم کے ہمراہ موجود تھے۔

ترک وزیر خارجہ حاقان فیدان نے وزیراعظم شہباز شریف کا پرتپاک خیرمقدم کیا اور انطالیہ ڈپلومیسی فورم میں شرکت پر پاکستان کی قیادت کا شکریہ ادا کیا۔ اس موقع پر انہوں نے بتایا کہ ترک صدر رجب طیب اردوان انطالیہ ڈپلومیسی فورم کے حاشیے پر وزیراعظم شہباز شریف سے ملاقات کے منتظر ہیں، جس میں دونوں ممالک کے برادرانہ تعلقات کو مزید مستحکم کرنے پر بات ہوگی۔

وزیراعظم شہباز شریف نے شاندار استقبال اور روایتی ترک مہمان نوازی پر وزیر خارجہ حاقان فیدان کا شکریہ ادا کرتے ہوئے کہا کہ ترکیہ کا دورہ ان کے لیے ہمیشہ باعث مسرت ہوتا ہے کیونکہ وہ اسے اپنا دوسرا گھر سمجھتے ہیں۔ وزیراعظم نے مزید کہا کہ انطالیہ ڈپلومیسی فورم جیسے عالمی پلیٹ فارم پر شرکت اور صدر رجب طیب ایردوان سے ملاقات ان کے لیے انتہائی اہمیت کی حامل ہے، جو دونوں ممالک کے درمیان دیرینہ تزویراتی شراکت داری کو مزید تقویت دے گی۔