لبنان اور اسرائیل 34 برس بعد آج براہ راست بات چیت کریں گے: ٹرمپ

واشنگٹن/بیروت: امریکی صدر ڈونلڈ ٹرمپ نے ایک تاریخی اعلان میں کہا ہے کہ لبنان اور اسرائیل کے درمیان جنگ بندی کے لیے براہِ راست مذاکرات کا آغاز آج سے ہو رہا ہے۔ صدر ٹرمپ کے مطابق، دونوں ممالک کے رہنما 34 برس کے طویل وقفے کے بعد پہلی بار آمنے سامنے بیٹھ کر بات چیت کریں گے۔ انہوں نے واضح کیا کہ وہ ان مذاکرات کی کامیابی اور خطے میں پائیدار امن کے قیام کے لیے ذاتی طور پر بھرپور کوششیں کر رہے ہیں۔

دوسری جانب، ایک طرف جہاں مذاکرات کی میز سج رہی ہے، وہیں لبنان پر اسرائیلی جارحیت کا سلسلہ تھم نہ سکا۔ گزشتہ 24 گھنٹوں کے دوران اسرائیلی فضائی حملوں میں مزید 43 شہری شہید ہو گئے ہیں۔ جنوبی لبنان کے علاقے بنت جبیل میں حزب اللہ اور اسرائیلی افواج کے درمیان گھمسان کی جنگ جاری ہے، جہاں اسرائیلی طیاروں اور ہیلی کاپٹروں نے شدید بمباری کی ہے۔ لبنانی میڈیا کے مطابق، اسرائیلی فورسز نے گرینڈ مارکیٹ کے قریب متعدد رہائشی مکانات کو مسمار کر دیا ہے، جبکہ قصبہ تبنین میں واقع اسپتال کو بھی فضائی حملے میں شدید نقصان پہنچا ہے۔