پاکستان سٹاک ایکسچینج میں کاروبار کا مثبت زون میں آغاز

کراچی: پاکستان اسٹاک ایکسچینج (PSX) میں تیزی کا سفر آج بھی برقرار رہا، جہاں کاروباری ہفتے کے چوتھے روز مارکیٹ نے ایک اور تاریخی سنگ میل عبور کر لیا ہے۔ کاروبار کے آغاز پر ہی سرمایہ کاروں کی جانب سے بھرپور دلچسپی دیکھی گئی، جس کے نتیجے میں 100 انڈیکس میں 2000 سے زائد پوائنٹس کا اضافہ ریکارڈ کیا گیا۔ اس تیزی کے بعد انڈیکس 1 لاکھ 70 ہزار 899 پوائنٹس کی ریکارڈ سطح پر پہنچ گیا ہے، جو ملکی معیشت پر سرمایہ کاروں کے پختہ اعتماد کا مظہر ہے۔

یاد رہے کہ گزشتہ کاروباری روز کے اختتام پر مارکیٹ 1 لاکھ 68 هزار 519 پوائنٹس پر بند ہوئی تھی، تاہم آج کے مثبت آغاز نے مارکیٹ کو نئی بلندیوں تک پہنچا دیا ہے۔ دوسری جانب، عالمی سطح پر ایشیائی اسٹاک مارکیٹس میں ملا جلا رجحان دیکھنے میں آ رہا ہے۔ جہاں جاپان کے نکی (Nikkei) انڈیکس میں 2 فیصد اور ہانگ کانگ کے ہینگ سینگ میں ڈیڑھ فیصد اضافہ ہوا، وہیں انڈونیشیا، ملائیشیا اور تھائی لینڈ کی مارکیٹس میں معمولی مندی ریکارڈ کی گئی ہے۔