پاکستان اور انگلینڈ کے درمیان تیسرا ٹیسٹ میچ آج سے برمنگھم میں شروع ہوگا

پاکستان اور انگلینڈ کے درمیان جاری ٹیسٹ سیریز کے تیسرے اور آخری میچ میں قومی ٹیم کلین سویپ (وائٹ واش) سے بچنے اور سیریز میں پہلی کامیابی حاصل کرنے کے لیے آج میدان میں اترے گی۔ انگلینڈ کو تین ٹیسٹ میچوں کی سیریز میں دو صفر کی فیصلہ کن اور ناقابلِ شکست برتری حاصل ہے، جبکہ برمنگھم کے تاریخی ایجبسٹن کرکٹ گراؤنڈ پر پاکستان آج تک کوئی ٹیسٹ میچ جیتنے میں کامیاب نہیں ہو سکا ہے، جس کے باعث قومی ٹیم کے لیے یہ میچ تاریخی اعتبار سے بھی ایک بڑا چیلنج بن چکا ہے۔

قومی ٹیم کے کپتان بابر اعظم نے ایجبسٹن گراؤنڈ کو اپنے لیے لکی قرار دیتے ہوئے امید ظاہر کی ہے کہ ٹیم اس میچ میں کم بیک کرتے ہوئے بہترین کارکردگی کا مظاہرہ کرے گی۔ میڈیا سے گفتگو کرتے ہوئے ان کا کہنا تھا کہ لارڈز ٹیسٹ کے بعد پلیئنگ الیون اور اسکواد میں ہونے والی اچانک تبدیلیوں پرانہیں حیرانی ضرور ہوئی، تاہم جب میدان میں نتائج اچھے نہ آ رہے ہوں تو انتظامیہ کو ایسی تبدیلیاں کرنا پڑتی ہیں۔ انہوں نے کہا کہ پاکستان کرکٹ بورڈ (پی سی بی) اور سلیکٹرز نے جو بھی فیصلے کیے ہیں وہ یقیناً سوچ سمجھ کر ہی کیے ہوں گے۔