انگلینڈ سے شکست کے بعد قومی ٹیم پوائنٹس ٹیبل پر آخری نمبر پر پہنچ گئی

انگلینڈ کے خلاف پہلے ٹیسٹ (ہیڈنگلے) میں اننگز اور 103 رنز کی ناکامی کے بعد پاکستان کی کرکٹ ٹیم ورلڈ ٹیسٹ چیمپئن شپ (WTC) کے پوائنٹس ٹیبل پر ویسٹ انڈیز سے بھی نیچے آخری نمبر پر چلی گئی ہے۔ قومی ٹیم کا پوائنٹ فیصد کم ہو کر 19.05 رہ گیا ہے۔ سیریز میں 1-0 کی برتری حاصل کرنے کے بعد انگلینڈ نے پوائنٹس ٹیبل پر اپنی پوزیشن بہتر بنا لی ہے۔

برطانوی میڈیا نے دورہ انگلینڈ پر موجود پاکستان کی ٹیسٹ ٹیم کی حالیہ کارکردگی کو سخت تنقید کا نشانہ بناتے ہوئے اسے گزشتہ 50 برسوں کی کمزور ترین ٹیم قرار دیا ہے۔ برطانوی صحافیوں کے مطابق پاکستانی فاسٹ باؤلنگ میں وہ پرانی رفتار اور معیار نظر نہیں آ رہا، جبکہ خراب فیلڈنگ اور بیٹنگ لائن میں تسلسل کے فقدان کے باعث انگلش بیٹرز نے آسان رنز بنائے۔ دونوں ٹیموں کے درمیان سیریز کا دوسرا ٹیسٹ میچ 27 اگست سے لارڈز کے تاریخی میدان میں کھیلا جائے گا۔