پاکستان کرکٹ ٹیم کے کھلاڑیوں کی بنگلا دیش میں شاپنگ

بنگلا دیش کے خلاف دوسرے فیصلہ کن ٹیسٹ میچ سے قبل پاکستان کرکٹ ٹیم کے کھلاڑیوں نے ذہنی تناؤ کم کرنے اور خود کو تروتازہ کرنے کے لیے سلہٹ کے مقامی شاپنگ سینٹر کا رخ کیا۔ پہلے ٹیسٹ میں شکست کے بعد قومی اسکواڈ ان دنوں دوسرے میچ کی تیاری کے لیے سلہٹ میں موجود ہے، جہاں کھلاڑیوں نے کھیل سے وقفہ لے کر روایتی اشیاء کی خریداری کی۔

شاپنگ کرنے والوں میں سابق کپتان بابر اعظم، اسٹار فاسٹ بولر شاہین شاہ آفریدی، حسن علی، سلمان علی آغا، ساجد خان، نعمان علی، عماد بٹ، غازی غوری اور ازان اویس سمیت بولنگ کوچ عمر گل بھی شامل تھے۔ کھلاڑیوں نے مقامی اسٹورز سے اپنے اہل خانہ اور عزیز و اقارب کے لیے تحائف خریدے، جبکہ بنگلا دیش کی مشہور روایتی ساڑھیاں کھلاڑیوں کی توجہ کا خاص مرکز رہیں جنہیں انہوں نے شوق سے خریدا۔ کھلاڑیوں کی موجودگی کے باعث شاپنگ سینٹر میں سیکیورٹی کے سخت انتظامات کیے گئے تھے۔ اس موقع پر مقامی شائقینِ کرکٹ کی بڑی تعداد بھی وہاں جمع ہو گئی جنہوں نے اپنے پسندیدہ اسٹارز کے ساتھ تصاویر بنوائیں اور آٹوگراف لیے۔

واضح رہے کہ پاکستان اور بنگلا دیش کے درمیان دو ٹیسٹ میچوں کی سیریز کا دوسرا اور آخری میچ کل سے سلہٹ میں شروع ہو رہا ہے۔ بنگلا دیش کو سیریز میں ایک صفر کی برتری حاصل ہے، جبکہ پاکستان کے لیے سیریز برابر کرنے کے لیے یہ میچ جیتنا ناگزیر ہے۔