ہاکی سیریز، قومی ٹیم نے جنوبی کوریا کو 1-3 سے شکست دے دی

اسلام آباد کے نصیر بندہ ہاکی اسٹیڈیم میں کھیلے گئے پہلے ہاکی ٹیسٹ میچ میں پاکستان نے جنوبی کوریا کو سنسنی خیز مقابلے کے بعد 1-3 سے شکست دے دی ہے۔ میچ کے پہلے کوارٹر میں دونوں ٹیمیں کوئی گول نہ کر سکیں، تاہم دوسرے کوارٹر کے 21 ویں منٹ میں سفیان خان نے پینلٹی کارنر کے ذریعے پاکستان کو برتری دلائی۔ اگرچہ 4 منٹ بعد جنوبی کوریا کے ‘یہ ہون وان’ نے گول کر کے مقابلہ برابر کر دیا، لیکن ہاف ٹائم کی وسل سے قبل ابو بکر محمود نے شاندار گول کر کے پاکستان کی برتری بحال کر دی۔ تیسرے کوارٹر میں سفیان خان نے اپنا دوسرا اور ٹیم کا تیسرا گول کر کے فتح یقینی بنا دی۔ دونوں ٹیموں کے درمیان دوسرا ٹیسٹ میچ 1 اگست 2026 کو کھیلا جائے گا۔