انڈر 18 ہاکی ورلڈ کپ کوالیفائر: پاکستان نے عمان کو 0-5 سے شکست دیدی

عمان کے شہر مسقط میں جاری مینز انڈر 18 ورلڈ کپ ہاکی کوالیفائر میں پاکستان نے شاندار کارکردگی کا مظاہرہ کرتے ہوئے میزبان عمان کو صفر کے مقابلے میں 5 گول سے عبرتناک شکست دیدی ہے۔ قومی ٹیم کی جانب سے عثمان نے بہترین کھیل پیش کرتے ہوئے دو گول داغے، جبکہ عدیل، یحییٰ نجیب اور فرحان اسلم نے ایک ایک بار گیند کو جال کی راہ دکھا کر ٹیم کی فتح میں اہم کردار ادا کیا۔ پاکستان ہاکی فیڈریشن (پی ایچ ایف) کے صدر محی الدین احمد وانی، ڈویلپمنٹ کمیٹی کے چیئرمین اولمپین اصلاح الدین صدیقی، اولمپین حسن سردار اور سلیکشن کمیٹی کے چیئرمین اولمپین سمیع اللہ خان سمیت دیگر ممبران نے اس بڑی کامیابی پر قومی جونیئر ٹیم کو مبارکباد پیش کی ہے اور اگلے میچز کے لیے نیک خواہشات کا اظہار کیا ہے۔

ایونٹ کے شیڈول کے مطابق، پاکستانی ٹیم کا اگلا مقابلہ 20 جولائی کو بنگلادیش کے خلاف رات ساڑھے 9 بجے طے تھا، جبکہ 21 جولائی کو قومی ٹیم اپنے روایتی حریف بھارت کے مدمقابل ہوگی۔ اس کے بعد 23 جولائی کو عمان اور بنگلہ دیش کے ساتھ بقیہ میچز کھیلے جائیں گے۔ ماہرین کے مطابق پہلے ہی میچ میں اتنی بڑی کامیابی سے پاکستانی کھلاڑیوں کے حوصلے بلند ہوئے ہیں اور ٹورنامنٹ میں ان کی پوزیشن مستحکم دکھائی دے رہی ہے۔