ورلڈکپ میں ٹاکرا، پاک بھارت کرکٹ بورڈز کیلیے کروڑوں ڈالر کی آمدنی کی راہ ہموار

ٹی ٹوئنٹی ورلڈ میں پاک بھارت ہائی وولٹیج ٹاکرے پر چھائے غیریقینی کے بادل چھٹتے ہی پاکستان اوربھارت کے کرکٹ بورڈز کےلیے کروڑوں ڈالر کے مالیاتی جیک پوٹ کی راہ ہموار ہوگئی

15فروری کو کولمبومیں ہونے والی کرکٹ کی عالمی جنگ پاکستان کرکٹ بورڈ کے لیے گیم چینجر ثابت ہوگی۔ بائیکاٹ ختم کرنے کے عوض پاکستان نے اپنے حصے میں اضافے اور مالی مراعات کے لیے بہتر ڈیل حاصل کرنے کی راہ ہموار کر لی۔ پی سی بی کے لیےیہ میچ پندرہ سے بیس ملین ڈالر کی کمائی کا ذریعہ ثابت ہوگا۔ جبکہ مقامی اشتہاری مارکیٹس اور نشریاتی حقوق سے بھی پی سی بی کو اربوں روپے کی آمدنی متوقع ہے۔

اس مالیاتی بہاؤ کا سب سے بڑا فائدہ بھارتی بورڈ کو پہنچے گا جو انٹرنیشنل کرکٹ کونسل کے موجودہ ماڈل کے تحت کل سالانہ آمدنی کا 38.5 فیصد یعنی تقریباً 230 ملین ڈالر وصول کرتا ہے۔

واضح رہے کہ پاک بھارت میچ کے انعقاد کے فیصلے سے انٹرنیشنل کرکٹ کونسل کو174 ملین امریکی ڈالرز کا فائدہ ہوگا۔یہ تخمینہ براڈکاسٹرز، گیٹ منی اور دیگر اسپانسرشپس سے ہونے والی آمدنی کی مدیں لگایا گیاہے

دوسری جانب میزبان سری لنکا کے لیے یہ بھی میچ ایک معاشی معجزہ ثابت ہو رہا ہے، جہاں ٹکٹوں کی فروخت اور سیاحوں کی آمد نے مقامی معیشت میں کروڑوں روپے کی نئی روح پھونک دی ہے۔

سری لنکا کرکٹ کو ٹکٹوں کی فروخت، گیٹ منی اور گراؤنڈ اشتہارات سے 25 سے 30 ملین ڈالر کی براہِ راست آمدنی متوقع ہے۔ اس کے علاوہ، کولمبو کے ہوٹلز، ایئرلائنز اور مقامی ٹرانسپورٹ کے شعبے پاک بھارت ٹاکرے سے 92 کروڑ روپے سے زائد کا بزنس سمیٹیں گے۔