کسی قسم کا دھماکا خیز مواد پولیس اسٹیشن نہ لائیں‘،کینیڈین پولیس کی اپیل

کینیڈا کی اونٹاریو پولیس نے شہریوں کو سخت ہدایت جاری کی ہے کہ اگر انہیں کسی بھی قسم کا دھماکا خیز مواد یا پرانا فوجی اسلحہ ملے تو اسے خود اٹھا کر پولیس اسٹیشن لانے سے مکمل گریز کریں۔ یہ ہنگامی ہدایت اس وقت جاری کی گئی جب ایک شہری نے جمعے کے روز دوسری جنگِ عظیم (WWII) کا ایک غیر پھٹا ہوا زندہ دستی بم (Hand Grenade) اوٹاوا میں اونٹاریو پروونشل پولیس کے ڈٹیچمنٹ دفتر میں لا کر جمع کرا دیا۔ او پی پی کے مشرقی ریجن نے سوشل میڈیا پر جاری ایک بیان میں واضح کیا ہے کہ ایسی خطرناک اشیا کو خود منتقل کرنا انتہائی جان لیوا ثابت ہو سکتا ہے، جس سے نہ صرف لانے والے شخص بلکہ آس پاس موجود دیگر شہریوں اور پولیس عملے کی زندگی بھی شدید خطرے میں پڑ سکتی ہے۔ پولیس نے شہریوں کو تاکید کی ہے کہ کسی بھی مشتبہ فوجی سامان یا بارودی مواد کی موجودگی کی صورت میں اسے اسی جگہ چھوڑ دیں اور فوری طور پر پولیس کو مطلع کریں تاکہ ان کی ایکسپلوسوز ڈسپوزل یونٹ (Explosives Disposal Unit) موقع پر پہنچ کر اسے محفوظ طریقے سے ناکارہ یا تلف کر سکے۔