امریکی صدر کی طرف سے ایرانی تجاویز مسترد کرنے پر تیل کی قیمتوں میں اضافہ

امریکی صدر ڈونلڈ ٹرمپ کی طرف سے ایرانی تجاویز مسترد کیے جانے کے بعد عالمی منڈی میں تیل کی قیمتوں میں اچانک اضافہ ہو گیا ہے۔ برطانوی خام تیل (برینٹ کروڈ) کی قیمت 4 فیصد اضافے کے ساتھ 105 ڈالر فی بیرل تک پہنچ گئی ہے، جبکہ امریکی خام تیل کی قیمت بھی 4 فیصد اضافے کے بعد 100 ڈالر فی بیرل کی سطح کو چھو رہی ہے۔

متحدہ عرب امارات کے مربن کروڈ کی قیمت میں 2 فیصد اضافہ ریکارڈ کیا گیا جس کے بعد یہ 99 ڈالر فی بیرل میں فروخت ہوا، جبکہ قدرتی گیس کی قیمتوں میں بھی 2 فیصد تک اضافہ دیکھا گیا ہے۔ یہ صورتحال اس وقت پیدا ہوئی جب صدر ٹرمپ نے جنگ کے خاتمے کے لیے امریکی منصوبے پر ایران کے جواب کو ناقابل قبول قرار دے کر مسترد کر دیا۔

صدر ٹرمپ نے اپنے سوشل میڈیا پلیٹ فارم ‘ٹروتھ سوشل’ پر سخت ردعمل دیتے ہوئے لکھا کہ انہوں نے ایران کے نام نہاد نمائندوں کی جانب سے دیا گیا جواب پڑھا ہے جو انہیں بالکل پسند نہیں آیا۔ انہوں نے اسے مکمل طور پر ناقابل قبول قرار دیا، جس کے بعد مشرق وسطیٰ میں کشیدگی بڑھنے کے خدشات کے پیش نظر عالمی توانائی مارکیٹ میں ہلچل مچ گئی ہے۔