ٹیلر سوئفٹ کی شادی سے جمع کیا گیا کچرا ہاتھوں ہاتھ فروخت

امریکی پاپ اسٹار ٹیلر سوئفٹ اور این ایف ایل (NFL) اسٹار ٹریوس کیلسی کی نیویارک کے میڈیسن اسکوائر گارڈن میں ہونے والی ہائی پروفائل شادی کے بعد ایک انوکھا واقعہ سامنے آیا ہے، جہاں ایک امریکی فنکار نے تقریب کے باہر سڑک سے جمع کیے گئے کچرے کو منفرد آرٹ ورک میں تبدیل کر دیا جسے مداحوں نے ہاتھوں ہاتھ خرید لیا۔ غیر ملکی میڈیا کے مطابق، نیویارک سے تعلق رکھنے والے آرٹسٹ جسٹن گگنیک نے باقاعدہ ٹکسیڈو (Tuxedo) پہن کر شادی کی تقریب کے بعد اسٹیڈیم کے اطراف کی سڑکوں سے کچرا جمع کیا اور اسے شفاف، ہوا بند ایکریلک کیوبز (Acrylic Cubes) میں سجا کر آرٹ پیسز کی شکل دی۔ اس کچرے میں سگریٹ کے ٹکڑے، بوتل کے ڈھکن، پلاسٹک کے چمچ، ایک بائیں کان کا گمشدہ ایئر پوڈ، رنگ پاپ اور ایک اوولیشن ٹیسٹ کٹ جیسی چیزیں شامل تھیں۔ جسٹن گگنیک نے “پاکٹ گاربیج: ناٹ انوائٹڈ ایڈیشن” کے نام سے ان چھوٹے کیوبز کو 25 ڈالر (تقریباً 7 ہزار پاکستانی روپے) اور بڑے کیوبز کو 100 ڈالر میں اپنی ویب سائٹ پر فروخت کے لیے پیش کیا، جو محض 24 گھنٹوں کے اندر ہی مکمل فروخت ہو گئے۔ فنکار کا کہنا تھا کہ انہوں نے یہ تمام چیزیں سیکیورٹی حدود سے باہر سڑک سے جمع کی تھیں تاکہ وہ اس تاریخی دن کی ایک یادگار کو محفوظ کر سکیں، اور ٹیلر سوئفٹ کے جنونی مداحوں (Swifties) نے اس منفرد یادگار کو خریدنے میں غیر معمولی دلچسپی دکھائی۔