بھارت کا انوکھا ریسٹورنٹ جہاں مُردوں کے ساتھ کھانا کھایا جاتا ہے

بھارتی شہر احمد آباد کے لال دروازہ علاقے میں واقع ‘نیو لکی ریسٹورنٹ’ اپنی نوعیت کی ایک منفرد جگہ ہے، جہاں گاہک پرانی قبروں کے گرد بیٹھ کر چائے، بن مکھن اور دیگر کھانوں سے لطف اندوز ہوتے ہیں۔ 1950ء کی دہائی میں قبرستان کے قریب چائے کے ایک چھوٹے سے سٹال سے شروع ہونے والے اس ریسٹورنٹ کی تعمیر کے وقت انتظامیہ نے قبروں کو منتقل کرنے کے بجائے انہیں لوہے کی ریلنگ سے محفوظ کر کے میزیں ان کے گرد لگا دیں۔ انتظامیہ روزانہ ان قبروں کی صفائی کر کے ان پر پھول سجاتی ہے۔ بغیر کسی سوشل میڈیا یا ویب سائٹ کے، یہ ریسٹورنٹ محض زبانی تشہیر، اپنی خاص چائے اور مشہور بھارتی مصور ایم ایف حسین کی آمد کی تاریخ کے باعث دہائیوں سے خاص و عام کی دلچسپی کا مرکز بنا ہوا ہے۔