نیشنل چیمپئنز کپ کا آغاز کل سے ملتان میں ہوگا، ٹرافی کی رونمائی کر دی گئی

نیشنل چیمپئنز کپ کا باقاعدہ آغاز کل سے پاکستان کے تاریخی کرکٹ شہر ملتان میں ہو رہا ہے، جس کے لیے ایونٹ کی زرق برق ٹرافی کی پروقار رونمائی کر دی گئی ہے۔

ٹرافی کی رونمائی کی تقریب میں ایونٹ میں شریک ٹیموں کے کپتانوں نے شرکت کی۔ پاکستان گولڈ کی قیادت میں شاداب خان کی عدم دستیابی پر فہیم اشرف کو ذمہ داریاں سونپی گئی ہیں جبکہ شاہین شاہ آفریدی بھی ٹیم کا حصہ ہیں۔ میڈیا سے گفتگو کرتے ہوئے پاکستان گولڈ کے شاہین شاہ آفریدی نے کہا کہ نیشنل چیمپئنز کپ جیسے اعلیٰ سطح کے مقابلے سے قومی ٹیم کے آئندہ ورلڈ کپ اسکواڈ کی تشکیل میں انتہائی آسانی اور مدد ملے گی۔

پاکستان بلیوز کے کپتان صاحبزادہ فرحان نے ایونٹ کی اہمیت پر زور دیتے ہوئے کہا کہ تمام کھلاڑیوں کے لیے یہ ٹورنامنٹ خود کو ثابت کرنے کا ایک اہم موقع ہے۔ پاکستان وائٹس کے کپتان صائم ایوب کا کہنا تھا کہ بطور پروفیشنل کرکٹر کھلاڑی کو ہر طرح کے حالات اور پچز پر پرفارم کرنا آنا چاہیے۔ دریں اثناء فہیم اشرف نے کہا کہ ملتان کے سخت موسم اور گرمی میں تمام کھلاڑیوں کو تیزی سے ایڈجسٹ ہونا پڑے گا۔

ایونٹ کا پہلا افتتاحی میچ کل سہ پہر 3:00 بجے ملتان کرکٹ سٹیڈیم میں پاکستان وائٹس اور پاکستان گرینز کے درمیان کھیلا جائے گا۔