نیشنل چیمپئنز کپ: پاکستان گرینز نے پاکستان وائٹس کو 5 وکٹوں سے شکست دیدی

نیشنل چیمپئنز کپ کے افتتاحی میچ میں پاکستان گرینز نے پاکستان وائٹس کو 5 وکٹوں سے شکست دے دی ہے۔ ملتان کرکٹ سٹیڈیم میں کھیلے گئے میچ میں پاکستان وائٹس نے ٹاس جیت کر پہلے بیٹنگ کا فیصلہ کیا اور مقررہ 50 اوورز میں 8 وکٹوں کے نقصان پر 276 رنز بنائے۔ پاکستان وائٹس کی جانب سے شاہ زیب خان نے 76، حسن نواز نے 56 اور خوشدل شاہ نے 51 رنز بنائے۔ گرینز کی جانب سے نسیم شاہ نے 3، فہیم اشرف نے 2 جبکہ سلمان مرزا اور مہران ممتاز نے ایک ایک وکٹ حاصل کی۔ جواب میں پاکستان گرینز نے 277 رنز کا ہدف ایک اوور قبل 5 وکٹوں کے نقصان پر حاصل کر لیا، جس میں فخر زمان کی 123 رنز کی شاندار اننگز نے کلیدی کردار ادا کیا۔