کیلے جیسی گاڑی کو ٹریفک پولیس نے روک لیا، سوشل میڈیا پر ہلچل

مونٹانا: امریکی ریاست مونٹانا کی ہائی وے پٹرول نے انٹر اسٹیٹ 90 پر ایک انتہائی غیر معمولی اور دلچسپ ٹریفک اسٹاپ کی تصاویر سوشل میڈیا پر شیئر کی ہیں، جہاں پولیس اہلکاروں نے ایک ایسی گاڑی کو چیکنگ کے لیے روکا جو ہوبہو ایک بڑے کیلے کی شکل میں تیار کی گئی تھی۔ بِلنگز شہر کے قریب پیش آنے والے اس واقعے میں ’بِگ بنانا کار‘ نامی یہ منفرد گاڑی سڑک کے کنارے سب کی توجہ کا مرکز بن گئی۔ ہائی وے پٹرول نے تصویر شیئر کرتے ہوئے ہلکے پھلکے انداز میں لکھا کہ انہوں نے اب تک تیز رفتاری اور لاپرواہی سے ڈرائیونگ کرنے والی کئی عجیب گاڑیاں روکی ہیں، لیکن یہ واقعی سب سے الگ اور ’دلکش‘ تھی؛ تاہم ٹریفک قوانین سب کے لیے برابر ہیں، چاہے گاڑی کوئی پھل ہی کیوں نہ ہو۔ دوسری جانب گاڑی کے مالک اور اسے بنانے والے ڈرائیور اسٹیو بریتھ ویٹ نے ایک مقامی ٹی وی چینل کو بتایا کہ وہ اس طرح کی پولیس چیکنگ کے عادی ہو چکے ہیں اور اپنی منفرد ساخت کی وجہ سے وہ ابتدائی آٹھ نو سالوں میں امریکہ کے سب سے زیادہ روکے جانے والے ڈرائیور رہ چکے ہیں۔