ویمنز ایشیا کپ: چیئرمین پی سی بی محسن نقوی کی دبئی میں پاکستان ویمن ٹیم سے ملاقات

پاکستان کرکٹ بورڈ (پی سی بی) کے چیئرمین محسن نقوی نے دبئی میں آئی سی سی اکیڈمی کے دورے کے موقع پر پاکستان ویمن کرکٹ ٹیم سے اہم ملاقات کی اور ویمنز ایشیا کپ کے لیے ان کا حوصلہ بڑھایا۔ اس ملاقات کے دوران پاکستان ویمن ٹیم کے ہیڈ کوچ وہاب ریاض اور دیگر کوچنگ اسٹاف کے ارکان بھی موجود تھے۔ چیئرمین پی سی بی نے کھلاڑیوں سے تفصیلی بات چیت کی اور ایونٹ کے لیے ان کی تیاریوں اور حکمتِ عملی کے بارے میں آگاہی حاصل کی۔

محسن نقوی نے کھلاڑیوں کو ہدایت کرتے ہوئے کہا کہ وہ میدان میں تسلسل کے ساتھ کھیلیں، اپنا پورا فوکس کھیل پر رکھیں اور میچ ٹو میچ کی حکمت عملی اپنا کر صرف جیت کے لیے میدان میں اتریں۔ انہوں نے کہا کہ قوم اور بورڈ کو ویمنز ایشیا کپ میں ٹیم سے بڑی امیدیں وابستہ ہیں۔ دوسری جانب ویمن کرکٹ ٹیم کی کھلاڑیوں نے عزم کا اظہار کرتے ہوئے کہا کہ انہوں نے اس اہم ایونٹ کے لیے بھرپور تیاری کی ہے اور وہ شائقینِ کرکٹ اور قوم کی توقعات پر پورا اترنے کی مکمل صلاحیت رکھتی ہیں۔