ایڈہاک صدر پی ایچ ایف نے ذمہ داریاں سنبھالتے ہی کپتان ہاکی ٹیم پر پابندی ختم کردی

پاکستان ہاکی فیڈریشن (پی ایچ ایف) کے نو منتخب ایڈہاک صدر محی الدین وانی نے اپنے عہدے کا چارج سنبھال لیا ہے۔ چارج سنبھالنے کے فوراً بعد انہوں نے قومی ہاکی ٹیم کے کپتان عماد بٹ پر عائد پابندی ختم کرنے کا بڑا اعلان کرتے ہوئے ہاکی کی بحالی کے لیے ہنگامی اقدامات کا آغاز کر دیا ہے۔

محی الدین وانی نے میڈیا سے گفتگو کرتے ہوئے کہا کہ ورلڈ کپ کوالیفائنگ راؤنڈ کے لیے وقت انتہائی کم ہے، جس کے پیشِ نظر فوری طور پر تربیتی کیمپ شروع کیا جا رہا ہے۔ انہوں نے واضح کیا کہ فیڈریشن میں تمام فیصلے شفافیت اور میرٹ کی بنیاد پر ہوں گے اور کھلاڑیوں کو انتظامی امور کے بجائے صرف اپنی ٹریننگ اور کھیل پر توجہ دینی چاہیے۔

ایڈہاک صدر کا مزید کہنا تھا کہ کوچنگ نظام میں بہتری اور ٹیم مینجمنٹ کی ازسرِ نو تشکیل ان کی اولین ترجیحات میں شامل ہے۔ واضح رہے کہ سابق صدر طارق بگٹی نے استعفیٰ دینے سے قبل کپتان عماد بٹ پر پابندی عائد کی تھی، جسے اب کالعدم قرار دے دیا گیا ہے۔ محی الدین وانی، جو سیکرٹری وزارتِ بین الصوبائی رابطہ بھی ہیں، کو وزیراعظم شہباز شریف کی منظوری کے بعد فیڈریشن کی ذمہ داری سونپی گئی ہے۔