کرکٹ مجموعی کارکردگی کا نام ہے، ہر میچ ون مین شو نہیں ہوسکتا، محمد علی

حیدرآباد کنگزمین کے فاسٹ بولر محمد علی نے ٹیم کی حالیہ کامیابیوں اور بدلتے ہوئے مومینٹم پر روشنی ڈالتے ہوئے کہا ہے کہ کرکٹ مجموعی کارکردگی کا نام ہے اور ہر میچ ‘ون مین شو’ نہیں ہوسکتا۔ کراچی میں پریس کانفرنس کرتے ہوئے انہوں نے اعتراف کیا کہ ٹورنامنٹ کے آغاز میں ٹیم کمبی نیشن نہ بننے کی وجہ سے مشکلات کا شکار تھی، تاہم کراچی آنے کے بعد ٹیم نے بہترین توازن حاصل کر لیا ہے جس سے پلے آف میں جگہ بنانے کے امکانات روشن ہو گئے ہیں۔

محمد علی نے ٹیم کے اسٹریٹجک پلان پر گفتگو کرتے ہوئے بتایا کہ ٹیم میں جارح مزاج بیٹرز کی موجودگی کے باعث مارنس لبوشین ‘اینکر’ کا کردار ادا کر رہے ہیں، جبکہ صائم ایوب کو فارم میں واپسی کے لیے صرف ایک اچھی اننگز کی ضرورت ہے۔ انہوں نے میچ وننگ پرفارمنس پر عثمان کی تعریف کی اور وکٹ کی صورتحال کے حوالے سے بتایا کہ آج کی پچ پر 110 سے 115 کلومیٹر کی رفتار والی گیندیں زیادہ موثر ثابت ہوئیں۔

فاسٹ بولر نے ڈریسنگ روم کے ماحول کو مثبت قرار دیتے ہوئے کوچز اور سینئر کھلاڑیوں کے کردار کو سراہا۔ ان کا کہنا تھا کہ گلین میکسویل جیسے عالمی معیار کے کھلاڑی کی موجودگی سے جونیئرز کو بہت کچھ سیکھنے کو مل رہا ہے۔ محمد علی نے واضح کیا کہ وہ کسی بھی بیٹر کے نام سے مرعوب ہوئے بغیر اپنے پلان کے مطابق بولنگ کرتے ہیں اور ان کے لیے ہر وکٹ برابر اہمیت رکھتی ہے۔ انہوں نے مزید کہا کہ ملتان کے خلاف جیت میں آخری چار اوورز کا درست استعمال کلیدی ثابت ہوا۔