مودی کے زیرِ اثر دنیا کی سب سے بڑی نام نہاد جمہوریت کا پردہ فاش

بھارت میں مودی حکومت پر کروڑوں شہریوں کا آئینی حق چھیننے اور انتخابی فہرستوں میں بڑے پیمانے پر ہیرا پھیری کر کے جمہوریت کو نقصان پہنچانے کے سنگین الزامات سامنے آئے ہیں۔ ناقدین کا کہنا ہے کہ نریندر مودی نے عوام کا سامنا کرنے کے بجائے اپنے خلاف اٹھنے والی سیاسی آوازوں کو ہی مٹانے کی حکمتِ عملی اپنا لی ہے۔

معروف بین الاقوامی جریدے ‘دی جاپان ٹائمز’ کی ایک رپورٹ کے مطابق، اقتدار پر گرفت مضبوط رکھنے کے لیے مودی حکومت بھارتی عوام کے حقیقی مینڈیٹ پر تکیہ کرنے کے بجائے اپنی مرضی کے ووٹرز تیار کر رہی ہے۔ رپورٹ میں انکشاف کیا گیا ہے کہ مودی نواز الیکشن کمیشن نے ‘اسپیشل انٹینسو ریویژن’ جیسی متنازع مہم کی آڑ میں انتخابی فہرستوں میں غیر معمولی اور یکطرفہ تبدیلیاں کی ہیں۔

مودی حکومت اب تک بھارت کی 9 ریاستوں (صوبوں) میں ساڑھے 6 کروڑ سے زائد ووٹرز کے نام انتخابی فہرستوں سے خارج کر چکی ہے، اور خدشہ ظاہر کیا جا رہا ہے کہ یہ تعداد جلد ہی 10 کروڑ تک پہنچ جائے گی۔ مودی حکومت کی ان سخت انتخابی پالیسیوں کے باعث مغربی بنگال میں جن لوگوں نے ووٹ کا حق کھویا ہے، وہ اب کسی بھی قسم کی سرکاری سہولت یا امداد حاصل کرنے کے اہل بھی نہیں رہے۔

فرانسیسی سیاسی ماہر جائلز ورنیئر نے ووٹر لسٹوں میں اس اچانک اور بڑے پیمانے پر کی جانے والی تبدیلی کو بھارتی تاریخ کی سب سے بڑی “انتخابی دھاندلی” قرار دیا ہے۔ دوسری جانب، معروف بھارتی سیاسی تجزیہ کار یوگیندر یادو کا کہنا ہے کہ مودی نے ریاستی قوانین اور اداروں کا بے جا استعمال کر کے اب ووٹروں کو ہی تبدیل کرنے کا خطرناک کھیل شروع کر دیا ہے۔

کانگریس کے سابق ترجمان سنجے جھا نے بھی اس صورتحال پر سخت تشویش کا اظہار کرتے ہوئے کہا ہے کہ مودی کے زیرِ اقتدار موجودہ بھارت میں الیکشن کمیشن اور بیوروکریسی سمیت تمام ریاستی ادارے اپنی غیر جانبداری کھو چکے ہیں اور انہوں نے مکمل طور پر سیاست کا رنگ اختیار کر لیا ہے۔