طالبان رجیم تقسیم کا شکار، طالبان کمانڈر قتل، امن وامان کے دعوے زمین بوس

افغان طالبان رجیم کے اندرونی خلفشار اور ملک میں بگڑتی ہوئی سکیورٹی صورتحال نے طالبان انتظامیہ کے امن و استحکام کے دعووں کی قلعی کھول دی ہے۔ طالبان رجیم جہاں عام عوام کو تحفظ دینے میں ناکام دکھائی دے رہی ہے، وہیں اب وہ اپنے اہم کمانڈرز کو بھی تحفظ فراہم کرنے میں بے بس نظر آتی ہے۔

‘دی افغانستان انٹرنیشنل’ کی رپورٹ کے مطابق، صوبہ ننگرہار کے ضلع چپرحار میں جمعہ کے روز افغان طالبان کے ایک مقامی کمانڈر کو فائرنگ کر کے بے دردی سے قتل کر دیا گیا۔ واقعے کے بعد افغان طالبان نے کارروائی کرتے ہوئے کمانڈر کے قتل کے شبہے میں اس کے اپنے سگے بھائی کو ہی گرفتار کر لیا ہے، جس سے خاندان اور تنظیم کے اندرونی اختلافات کی بو آتی ہے۔

سرکاری اعلامیے کے مطابق، مقتول طالبان کمانڈر کی شناخت ‘مسافر’ کے نام سے ہوئی ہے۔ بتایا گیا ہے کہ مقتول کمانڈر چند روز کی چھٹی گزارنے کے لیے اپنے گھر آیا ہوا تھا، جہاں نامعلوم افراد نے اسے نشانہ بنایا۔

 سیاسی و دفاعی ماہرین کے مطابق، افغان طالبان کے کمانڈرز پر حملوں اور ہلاکتوں کے بڑھتے ہوئے حالیہ واقعات داخلی اختلافات، مقامی سطح پر جاری مزاحمت اور سکیورٹی کی بدترین صورتحال کی واضح عکاسی کرتے ہیں۔ طالبان رجیم کو اس وقت بیک وقت اندرونی بغاوت، بڑھتے ہوئے مسلح حملوں اور شدید سکیورٹی بحران جیسے سنگین چیلنجز کا سامنا ہے۔ ماہرین کا مزید کہنا ہے کہ اپنے ہی کمانڈر کی اس طرح ہلاکت اس بات کا واضح ثبوت ہے کہ طالبان رجیم کے خلاف نفرت اور عدم اطمینان اب عوامی اور داخلی سطح پر شدت اختیار کرتا جا رہا ہے۔