چھوٹی بچی کے ہاتھ میں موبائل فون خوفناک دھماکے سے پھٹ گیا، ویڈیو وائرل

چین میں پیش آنے والے ایک خوفناک واقعے نے اسمارٹ فون صارفین، بالخصوص والدین کو تشویش میں مبتلا کر دیا ہے، جہاں چارجنگ کے دوران استعمال کیا جانے والا موبائل فون ایک کم عمر بچی کے ہاتھ میں دھماکے سے پھٹ گیا۔ گھر کے سیکیورٹی کیمرے میں محفوظ ہونے والی اس ویڈیو میں دیکھا جا سکتا ہے کہ بچی صوفے پر بیٹھی فون کو چہرے کے قریب رکھ کر استعمال کر رہی تھی کہ اچانک زوردار دھماکہ ہوا۔

خوش قسمتی سے بچی اس حادثے میں کسی بڑے جانی نقصان سے محفوظ رہی، تاہم دھماکے کی شدت سے وہ صوفے سے نیچے جا گری۔ ماہرین کا کہنا ہے کہ موبائل فونز میں ایسے واقعات عام طور پر اوور ہیٹنگ (زیادہ گرم ہونا)، غیر معیاری بیٹریاں، یا چارجنگ کے دوران ہائی وولٹیج کی وجہ سے پیش آتے ہیں۔ ماہرین نے تاکید کی ہے کہ فون کو چارجنگ پر لگا کر استعمال کرنے سے گریز کریں، کیونکہ اس دوران بیٹری پر دباؤ بڑھ جاتا ہے جو کسی بھی وقت حادثے کا سبب بن سکتا ہے۔