4 آم کی قیمت صرف ’’6 لاکھ 12 ہزار روپے‘‘

آم کو دنیا بھر میں پھلوں کا بادشاہ تسلیم کیا جاتا ہے اور پاکستان و بھارت سمیت دنیا کے بیشتر ممالک میں اس کی عمومی قیمت 400 سے 500 روپے فی کلو تک ہوتی ہے۔ تاہم، آم کی ایک خاص نسل ایسی بھی ہے جس کا ایک کلو 6 لاکھ روپے سے زائد میں فروخت ہوتا ہے۔ جاپانی نسل ‘میازاکی’ سے تعلق رکھنے والے اس نایاب آم نے اپنی قیمت اور منفرد خصوصیات کی وجہ سے سب کو حیران کر دیا ہے۔

بھارتی ریاست گجرات کے کاشتکار سندیپ چوہدری نے یہ نایاب آم کامیابی سے کاشت کیے، جس کا ایک کلو (مجموعی طور پر 4 آم) سورت کے ایک ممتاز تاجر پروین گپتا نے 2 لاکھ 11 ہزار بھارتی روپے (تقریباً 6 لاکھ 12 ہزار پاکستانی روپے) میں خرید لیا۔ کاشتکار نے اس پیش رفت پر انتہائی مسرت کا اظہار کرتے ہوئے بتایا کہ خریدار گزشتہ ایک سال سے اس خاص پھل کے لیے ان کے ساتھ رابطے میں تھے۔

شاندار سرخ رنگت اور خوبصورت بناوٹ کی وجہ سے اس آم کو ‘سورج کا انڈا’ (Egg of the Sun) بھی کہا جاتا ہے۔ یہ آم نہ صرف ذائقے اور رنگت میں بے مثال ہے بلکہ طبی لحاظ سے بھی انتہائی مفید ہے۔ عام آموں کے مقابلے میں میازاکی آم میں وٹامن اے، وٹامن سی، بیٹا کیروٹین اور اینٹی آکسیڈنٹس کی مقدار کہیں زیادہ پائی جاتی ہے۔