امریکا: ایک غلط ’کلک‘ نے خاتون کی قسمت بدل دی

اوک لینڈ کاؤنٹی، مشیگن: امریکی ریاست مشیگن سے تعلق رکھنے والی ایک 57 سالہ خاتون، جن کی شناخت ظاہر نہیں کی گئی، اپنی زندگی کی سب سے خوشگوار حیرت کا شکار ہوئیں۔ خاتون مشیگن لاٹری کی ویب سائٹ پر اپنے مخصوص نمبروں کا سیٹ استعمال کرتے ہوئے ٹکٹ خرید رہی تھیں کہ اچانک ان سے ایک تکنیکی غلطی سرزد ہو گئی۔

خاتون کے مطابق وہ نمبر “47” منتخب کرنا چاہتی تھیں، لیکن غلطی سے ان کا کلک “39” پر ہو گیا۔ عام طور پر لوگ ایسی غلطی پر ٹکٹ منسوخ کر دیتے ہیں، لیکن انہوں نے اپنی والدہ کی اس نصیحت کو یاد کیا کہ “دنیا میں اتفاقات جیسی کوئی چیز نہیں ہوتی” اور اسی غلط نمبر والے ٹکٹ کو رکھنے کا فیصلہ کیا۔ ان کا یہ فیصلہ اس وقت درست ثابت ہوا جب رات کو انہیں ایک غیر معمولی ای میل موصول ہوئی، جس میں بتایا گیا کہ ان کے منتخب کردہ پانچوں نمبر (08-10-11-22-39) میچ کر گئے ہیں اور وہ 2 لاکھ 51 ہزار 738 ڈالر کا جیک پاٹ جیت چکی ہیں۔