مائیکل سمتھ 2 سال کیلئے پاکستان کرکٹ ٹیم کے بیٹنگ کوچ مقرر

پاکستان کرکٹ بورڈ (پی سی بی) نے جنوبی افریقہ کے سابق فرسٹ کلاس کرکٹر 46 سالہ مائیکل سمتھ کو پاکستان کی قومی کرکٹ ٹیم کا نیا بیٹنگ کوچ مقرر کرنے کی تصدیق کر دی ہے۔ معاہدے کے تحت مائیکل سمتھ آئندہ دو سالوں کے لیے ریڈ بال (ٹیسٹ) اور وائٹ بال (ون ڈے و ٹی 20) دونوں فارمیٹس کی ٹیموں کے ساتھ بطور بیٹنگ کوچ ذمہ داریاں نبھائیں گے۔ وہ انگلینڈ کے خلاف آئندہ ماہ 19 اگست سے شروع ہونے والی 3 ٹیسٹ میچوں کی سیریز کے لیے قومی اسکواڈ کو جوائن کریں گے۔

مائیکل سمتھ بہترین کوچنگ صلاحیتوں اور وسیع تجربے کے حامل ہیں۔ وہ لیول فور (Level 4) کوچنگ کوالیفکیشن رکھتے ہیں اور اس سے قبل آسٹریلین ڈومیسٹک ٹیم کرکٹ تسمانیہ، بگ بیش لیگ کی فرنچائز ہوبارٹ ہریکینز اور پاکستان سپر لیگ (HBL PSL) کی تین مختلف فرنچائزز کے کوچنگ اسٹاف کے ساتھ کام کر چکے ہیں۔ اپنے کرکٹ کیریئر کے دوران انہوں نے فرسٹ کلاس، لسٹ اے اور ٹی 20 فارمیٹس میں مجموعی طور پر 7 ہزار 29 رنز بنائے، جن میں 9 سنچریاں اور 40 نصف سنچریاں بھی شامل ہیں۔ پی سی بی کو امید ہے کہ ان کے تجربے سے قومی بلے بازوں کی کارکردگی میں بہتری آئے گی۔