ناک کی بالی پھیپھڑے میں پھنس گئی، خاتون معجزانہ طور پر بچ گئی

میکسیکو سٹی: میکسیکو سے تعلق رکھنے والی 26 سالہ خاتون مونیکا دیانیرا کاربریرا باراجاس ایک ایسے طبی معجزے کے بعد خبروں کا مرکز بن گئی ہیں جس نے ڈاکٹروں کو بھی حیران کر دیا۔ مونیکا گزشتہ ایک ماہ سے مسلسل کھانسی کا شکار تھیں، جسے وہ عام الرجی یا انفیکشن سمجھتی رہیں، تاہم جب تکلیف حد سے بڑھی تو ایکسرے رپورٹ نے ہوش اڑا دیے۔ رپورٹ کے مطابق، مونیکا کے پھیپھڑے میں ایک دھاتی ٹکڑا موجود تھا، جو دراصل ان کی ناک کی بالی (Nose Ring) تھی جو سونے کے دوران غیر محسوس طریقے سے سانس کے ذریعے اندر چلی گئی تھی۔

مونیکا نے سوشل میڈیا پر اپنے تجربے کا تذکرہ کرتے ہوئے بتایا کہ انہیں بالی غائب ہونے کا احساس تو ہوا تھا، لیکن یہ کبھی وہم و گمان میں بھی نہ تھا کہ وہ اسے نگلنے کے بجائے سانس کے ذریعے پھیپھڑے تک پہنچا چکی ہیں۔ ڈاکٹروں نے صورتحال کو “انتہائی تشویشناک” قرار دیا کیونکہ وہ گول دھاتی ٹکڑا انسانی شہ رگ (Aorta) سے محض 0.5 ملی میٹر کے فاصلے پر تھا۔ ذرا سی حرکت یا تاخیر مونیکا کے لیے جان لیوا ثابت ہو سکتی تھی۔ڈاکٹروں کا کہنا ہے کہ مونیکا خوش قسمت تھیں کہ دھاتی بالی نے پھیپھڑے کی کسی بڑی رگ کو نقصان نہیں پہنچایا۔ سرجری کے دوران ڈاکٹروں کو پہلی کوشش میں ناکامی ہوئی کیونکہ ٹکڑا جسم کے اندر مضبوطی سے پیوست ہو چکا تھا، تاہم ڈیڑھ گھنٹے کی سخت جدوجہد کے بعد اسے نکال لیا گیا۔ اس خوفناک تجربے کے بعد مونیکا نے مداحوں کو خبردار کیا ہے کہ وہ زیورات کے استعمال میں احتیاط برتیں۔ انہوں نے واضح کیا کہ اگرچہ انہیں ناک چھدوانے کا شوق تھا، لیکن اب وہ زندگی بھر دوبارہ ایسا کوئی رسک نہیں لیں گی۔