امریکا: 55 ٹی شرٹس پہن کر میراتھن میں دوڑنے کا ریکارڈ

امریکہ کی ایک خاتون ایتھلیٹ نے ہمت اور انوکھے پن کی نئی مثال قائم کرتے ہوئے 55 ٹی شرٹس پہن کر ہاف میراتھن مکمل کر لی اور اپنا نام گینیز ورلڈ ریکارڈز میں درج کروا لیا۔ امریکی ریاست آرکنساس سے تعلق رکھنے والی میریڈتھ اسمتھ نے گزشتہ سال 30 مارچ کو ‘فورٹ اسمتھ ہاف میراتھن’ میں یہ کارنامہ انجام دیا تھا، جس کی اب عالمی ادارے کی جانب سے باقاعدہ تصدیق کر دی گئی ہے۔ میریڈتھ نے خواتین کی کیٹگری میں سب سے زیادہ ٹی شرٹس پہن کر دوڑنے کا ریکارڈ توڑتے ہوئے یہ فاصلہ محض 3 گھنٹے اور 30 منٹ میں طے کیا۔

گینیز ورلڈ ریکارڈز سے گفتگو کرتے ہوئے میریڈتھ اسمتھ نے اس کامیابی کو اپنے لیے انتہائی جذباتی اور خاص قرار دیا۔ انہوں نے بتایا کہ ان کا سفر 2013 میں وزن کم کرنے کے ارادے سے شروع ہوا تھا اور اس وقت انہوں نے کبھی خواب میں بھی نہیں سوچا تھا کہ وہ ایک دن عالمی ریکارڈ ہولڈر بن جائیں گی۔ 55 ٹی شرٹس کے اضافی وزن اور گرمی کے باوجود میراتھن مکمل کرنا ان کے عزم اور محنت کا منہ بولتا ثبوت ہے۔ سوشل میڈیا پر اس انوکھے ریکارڈ کو بھرپور پذیرائی مل رہی ہے اور اسے فٹنس کے شوقین افراد کے لیے ایک بڑی ترغیب قرار دیا جا رہا ہے۔