ذہنی مریض مینٹل ہسپتال بلڈ بینک کی ایمبولینس لے اُڑا

لاہور: لاہور کے مینٹل ہسپتال میں انتظامیہ کی مجرمانہ غفلت اس وقت سامنے آئی جب ہسپتال میں زیرِ علاج ایک ذہنی مریض صبح 5 بجے بلڈ بینک کی ایمبولینس لے کر فرار ہو گیا اور شاہدرہ ہسپتال جا پہنچا۔ ذرائع کے مطابق جب ہسپتال کا عملہ سو رہا تھا، مریض نے دفتر سے گاڑی کی چابی اٹھائی اور خاموشی سے ایمبولینس نکال کر سڑکوں پر نکل گیا۔

مریض جب ایمبولینس چلا کر شاہدرہ ہسپتال پہنچا تو وہاں موجود عملے سے مطالبہ کیا کہ “میرا خون لے لو”۔ عملے کے استفسار پر کہ وہ یہاں کیسے پہنچا، مریض نے برجستہ جواب دیا کہ “میں خود گاڑی چلا کر آیا ہوں”۔ اس انکشاف پر ہسپتال میں کھلبلی مچ گئی کیونکہ ایک ذہنی مریض کا مصروف شاہراہوں پر ایمبولینس چلانا سینکڑوں شہریوں کی زندگیوں کے لیے بڑا خطرہ بن سکتا تھا۔

ذرائع کا کہنا ہے کہ مذکورہ مریض 2022 سے ہسپتال میں داخل ہے۔ واقعے کے بعد مینٹل ہسپتال کی انتظامیہ نے چار رکنی انکوائری کمیٹی تشکیل دے دی ہے جسے 24 گھنٹوں میں رپورٹ پیش کرنے کا حکم دیا گیا ہے۔ دوسری جانب میڈیکل سپرنٹنڈنٹ (MS) نے سارا ملبہ بلڈ ٹرانسفیوژن اتھارٹی پر ڈالتے ہوئے موقف اختیار کیا ہے کہ مذکورہ ایمبولینس ان کی تھی جسے گیٹ پر نہیں روکا جاتا۔