مصر کے مشہور ہرم میں خفیہ راستے کا انکشاف

قاہرہ: ماہرینِ آثارِ قدیمہ نے مصر کے مشہور اہرام میں سے ایک، مینکور ہرم، میں داخلے کا ایک خفیہ راستہ دریافت کیا ہے۔

گِزا میں موجود تین مرکزی اہرام میں سب سے چھوٹے ہرم، مینکور ہرم، کے بارے میں خیال کیا جاتا ہے کہ اسے تقریباً 4550 برس قبل مینکور فرعون کے لیے بنایا گیا تھا۔

سائنس دانوں کا طویل عرصے سے ماننا تھا کہ اس ہرم میں ممکنہ طور پر کوئی اضافی راستہ موجود ہو سکتا ہے، اور اب محققین کی ایک ٹیم نے ایسا ثبوت حاصل کیا ہے جو اس قیاس کو حقیقت میں بدل سکتا ہے۔

تحقیقاتی ٹیم نے ہائی ٹیک ریڈار اور الٹرا ساؤنڈ کے ذریعے ہرم کے مشرقی پہلو میں حیران کن اشارے دریافت کیے ہیں، جن میں دو خالی جگہیں سامنے آئیں۔ ان جگہوں میں چار میٹر بلند اور چھ میٹر چوڑے زبردست پالش شدہ پتھر پائے گئے ہیں۔

ماہرین کے مطابق اس طرح کے پالش شدہ پتھر ہرم کے شمالی جانب مرکزی داخلے پر بھی ملتے ہیں، جس سے اندازہ ہوتا ہے کہ یہ ممکنہ خفیہ راستہ ہرم کے اندرونی ڈھانچے کا حصہ ہو سکتا ہے۔