اسرائیل کو ’’قدرت کی سزا‘‘، شہد کی مکھیوں کے بڑے جھنڈ کا حملہ

اسرائیل کے جنوبی شہر نیتیووت سمیت مختلف علاقوں میں شہد کی مکھیوں کے بڑے جھنڈوں کی اچانک آمد نے مقامی آبادی میں خوف و ہراس پھیلا دیا، جس کی ویڈیوز سوشل میڈیا پر تیزی سے وائرل ہو رہی ہیں۔ عینی شاہدین کے مطابق، ہزاروں مکھیوں کے جھنڈ نے بازاروں اور تجارتی مراکز کو گھیر لیا، جس کے باعث شہریوں نے خود کو گھروں اور دکانوں میں محصور کر لیا۔

حکام نے احتیاطی تدابیر کے طور پر شہریوں کو کھڑکیاں اور دروازے بند رکھنے کی ہدایت کی ہے، جبکہ ایک غیر معمولی واقعے میں مکھیوں کے جھنڈ نے ایک فوجی طیارے کے انجن کے قریب جمع ہو کر اس کی اڑان میں بھی رکاوٹ ڈالی۔ سوشل میڈیا پر جہاں کچھ صارفین اسے مذہبی تناظر میں قدرتی انتباہ قرار دے رہے ہیں، وہیں ماہرینِ ماحولیات نے ان قیاس آرائیوں کو مسترد کر دیا ہے۔

ماہرین کے مطابق، یہ ایک فطری موسمی عمل ہے جسے ‘سوارمنگ’ (Swarming) کہا جاتا ہے۔ اس عمل میں مکھیاں اپنی ملکہ کے ساتھ مل کر نئی بستی بسانے کے لیے نقل مکانی کرتی ہیں۔ ماہرین کا کہنا ہے کہ بہار کے موسم اور درجہ حرارت میں اضافے کی وجہ سے یہ عمل تیز ہو جاتا ہے، اور اگرچہ یہ منظر دیکھنے میں خوفناک لگتا ہے، لیکن مکھیاں اس حالت میں عام طور پر حملہ آور نہیں ہوتیں اور صرف عارضی قیام کرتی ہیں۔