بیماری کی چھٹی لینے پر منیجر نے ملازم سے لائیو لوکیشن مانگ لی

نئی دہلی: بھارت میں ایک نجی کمپنی کے منیجر کی جانب سے بیمار ورکر سے چھٹی لینے کے بدلے لائیو لوکیشن مانگنے کا انوکھا اور متنازع واقعہ سامنے آ گیا، جس پر سوشل میڈیا پر شدید بحث چھڑ گئی ہے۔

خبر ایجنسی کے مطابق متاثرہ ملازم نے سوشل میڈیا پر اپنی پوسٹ میں بتایا کہ اس نے سر میں شدید درد کے باعث دفتر سے چھٹی کی درخواست کی، تاہم منیجر نے چھٹی دینے کے بجائے اس سے لائیو لوکیشن بھیجنے کا مطالبہ کر دیا۔ ملازم کا کہنا ہے کہ اس نے منیجر سے سوال کیا کہ لائیو لوکیشن کیوں درکار ہے، لیکن اس کے باوجود منیجر اپنے مؤقف پر قائم رہا۔

ملازم کی جانب سے واقعہ سامنے آنے کے بعد سوشل میڈیا صارفین نے منیجر کے رویے کو غیر پیشہ ورانہ اور ذاتی حدود میں مداخلت قرار دیتے ہوئے سخت تنقید کا نشانہ بنایا۔ متعدد صارفین نے کمپنی کی انتظامیہ سے مطالبہ کیا کہ ایسے منیجر کے خلاف فوری کارروائی کی جائے اور اسے عہدے سے ہٹایا جائے۔

سوشل میڈیا پر تبصروں میں کہا گیا کہ بیماری کی صورت میں ملازم سے لائیو لوکیشن طلب کرنا اعتماد کی کمی اور کام کی جگہ پر منفی ماحول کی عکاسی کرتا ہے، جبکہ ایسے رویے سے ملازمین کی ذہنی صحت بھی متاثر ہوتی ہے۔

یہ واقعہ بھارت میں کام کی جگہ پر ملازمین کے حقوق، پرائیویسی اور منیجمنٹ کے رویے سے متعلق ایک نئی بحث کو جنم دے رہا ہے۔