آوارہ کتوں سے پریشان شہری خود ’کتا‘ بن کر احتجاج کرنے پہنچ گیا

نئی دہلی: بھارت کی ریاست مدھیہ پردیش کے شہر کھنڈوا میں آوارہ کتوں کے بڑھتے ہوئے خطرے سے تنگ ایک شہری نے انتظامیہ کی توجہ حاصل کرنے کے لیے انتہائی انوکھا اور عجیب و غریب طریقہ اختیار کر لیا، جس نے سرکاری حکام اور وہاں موجود تمام لوگوں کو حیران کر دیا۔

شہر میں آوارہ کتوں کی بڑھتی ہوئی تعداد سے پریشان شہری کتے کا ماسک پہن کر اور کتے کا روپ دھار کر باقاعدہ ایک سرکاری ‘عوامی سماعت’ کے دوران میونسپل کارپوریشن کے دفتر پہنچ گیا، جہاں اس نے خاموش مگر اثر انگیز احتجاج کیا۔ شہری کا یہ انوکھا حلیہ دیکھ کر سیکیورٹی اہلکاروں نے ابتدا میں اسے عمارت کے اندر داخل ہونے سے روک دیا، تاہم اپوزیشن رہنماؤں کی مداخلت اور احتجاج کے بعد اسے اندر جانے کی اجازت دے دی گئی۔

احتجاج میں شامل میونسپل کارپوریشن کے اپوزیشن لیڈر دیپک راٹھور نے مقامی میڈیا سے گفتگو کرتے ہوئے شدید تحفظات کا اظہار کیا۔ انہوں نے الزام لگایا کہ میونسپل حکام نے گزشتہ چار سالوں کے دوران آوارہ کتوں کی نس بندی (Sterilization) کے نام پر تقریباً 40 لاکھ بھارتی روپے خرچ کیے ہیں، لیکن اس کے باوجود شہر میں آوارہ کتوں کی تعداد کم ہونے کے بجائے مسلسل بڑھ رہی ہے۔ ان کا دعویٰ تھا کہ اسی عرصے کے دوران شہر میں کتے کے کاٹنے (Dog Bite) کے 13 ہزار 225 سے زائد واقعات درج ہو چکے ہیں، جس کے باعث شہری، خصوصاً بچے اور بزرگ گھروں سے نکلتے ہوئے شدید خوف کا شکار ہیں۔

مظاہرین نے ضلعی انتظامیہ سے نس بندی مہم، اس پر آنے والے تمام اخراجات، جاری کیے گئے ٹینڈرز اور متعلقہ ایجنسی کی شفاف تحقیقات کا مطالبہ کیا ہے۔ انہوں نے سوال اٹھایا کہ اگر لاکھوں روپے خرچ ہو چکے ہیں تو پھر کتوں کی تعداد کم کیوں نہیں ہوئی؟ معاملے کا نوٹس لیتے ہوئے ایڈیشنل ڈسٹرکٹ مجسٹریٹ نے شکایات کی مکمل تحقیقات کی یقین دہانی کرائی اور کہا کہ اگر مالیاتی یا انتظامی بے ضابطگیاں ثابت ہوئیں تو ذمہ داروں کے خلاف سخت قانونی کارروائی کی جائے گی۔