بھارت: بے ہوش سانپ کو شخص نے سی پی آر دے کر بچا لیا

بھارت کی ریاست گجرات میں ایک انوکھا اور حیران کن واقعہ پیش آیا ہے جہاں زہریلے کیمیکل والے پانی میں گر کر بے ہوش ہونے والے سانپ کو ایک شہری نے منہ سے سی پی آر (CPR) دے کر زندگی کی نئی رمق بخش دی۔ واقعے کی حیرت انگیز ویڈیو سوشل میڈیا پر تیزی سے وائرل ہو رہی ہے جسے دیکھ کر صارفیں اور نیچر لوورز شدید حیرت کا اظہار کر رہے ہیں۔

تفصیلات کے مطابق یہ واقعہ گجرات کے صنعتی شہر واپی میں پیش آیا، جہاں ایک سانپ مبینہ طور پر کیمیکل ملے زہریلے پانی میں گرنے کے بعد دم گھٹنے سے شدید متاثر ہوا اور بے حس و حرکت ہو گیا۔ سانپ کی تڑپتی اور نیم مردہ حالت دیکھ کر وہاں موجود ایک شخص نے اسے مرنے کے لیے چھوڑنے کے بجائے فوری ریسکیو کرنے کا فیصلہ کیا۔ شہری نے انتہائی مہارت اور ہمت کا مظاہرہ کرتے ہوئے سانپ کو پانی سے باہر نکالا اور اس کی سانس بحال کرنے کے لیے اسے براہِ راست منہ سے مصنوعی سانس (Mouth-to-Mouth CPR) دینا شروع کی، جس کے نتیجے میں سانپ کی سانسیں بحال ہو گئیں اور وہ موت کے منہ میں جانے سے بچ گیا۔