امریکا شہری نے ایک جیسے 50 ٹکٹوں پر 50 انعام جیت لیے

امریکہ کی جنوبی کیرولائنا ایجوکیشن لاٹری میں ایک دلچسپ اور حیرت انگیز واقعہ سامنے آیا ہے جہاں ایک شخص نے ایک ہی نمبر کے 50 ٹکٹ خرید کر تمام ٹکٹوں پر انعام اپنے نام کر لیا۔ جنوبی کیرولائنا کے علاقے لوکَنٹری سے تعلق رکھنے والے اس خوش نصیب شخص نے 18 اگست کی شام ہونے والی ’پِک فور‘ قرعہ اندازی کے لیے مختلف کنوینینس اسٹورز سے 0-0-5-0 نمبروں کے 50 ایک جیسے ٹکٹ خریدے تھے۔ اس کا کہنا تھا کہ اسے ان ہندسوں کے بارے میں اندرونی طور پر ایک اچھا احساس ہوا تھا جس کی وجہ سے اس نے اتنی بڑی تعداد میں ٹکٹ خریدنے کا فیصلہ کیا۔ قرعہ اندازی میں اس کے تمام منتخب کردہ نمبر بالکل درست ثابت ہوئے اور ہر ٹکٹ پر اسے 5 ہزار ڈالر کا انعام ملا، جس کے بعد 50 ٹکٹوں سے ملنے والی انعامی رقم کا مجموعی تخمینہ 2 لاکھ 50 ہزار ڈالر بن گیا۔ فتح کے بعد خوشی کا اظہار کرتے ہوئے فاتح کا کہنا تھا کہ اسے پورا یقین تھا کہ اس کی قسمت اس کا ساتھ دے گی۔